Մեծ Յաջողութիւն Արձանագրելով Իսրայէլի Մէջ Օպամա Այցելեց Յորդանան` Աւարտելով Միջին
Արեւելեան Իր Շրջապտոյտը:
Աւարտելով Միջին Արեւելք կատարած իր եռօրեայ այցելութիւնը` Միացեալ Նահանգներու նախագահ
Պարաք Օպամա երէկ այցելեց Ամման, ուր Յորդանանի Ապտալլա Բ. թագաւորին հետ քննեց շրջանի
ընդհանուր իրավիճակը` սուրիական տագնապի ու գաղթականներու հոսքի լոյսին տակ: Այս առիթով
Օպամա 200 միլիոն տոլարի օժանդակութիւն խոստացաւ Յորդանանի` հանգստացնելով Ապտալլա Բ.
թագաւորը եւ փարատելով անոր մտավախութիւնները երկրի տնտեսութեան փլուզումի վտանգին գծով:
Միւս կողմէ, Օպամա վերահաստատեց Սուրիոյ վարչակարգին դէմ իր ժխտական կեցուածքը` «ապօրինի»
որակելով նախագահ Պաշշար Ասատի իշխանութեան վրայ մնալը: Յայտնենք, որ ծագումով պաղեստինցի
յորդանանցիներ ցոյց մը կազմակերպեցին` բողոքելով Օպամայի այցելութեան դէմ: Հանդիպումի
աւարտին միացեալ մամլոյ ասուլիս տալով` Օպամա եւ Ապտալլա Բ. թագաւորը յայտնեցին, որ Իսրայէլի
հետ բանակցութեանց հոլովոյթը պիտի վերսկսի: Նշենք, որ նախքան այդ, Օպամա կարճատեւ
այցելութիւն մը տուաւ պաղեստինեան Ռամալլա շրջանը: Իսկ Բեթղեհէմի մէջ նախագահ Պարաք
Օպամա բարերար «կնքահայր» եղաւ Թուրքիոյ եւ Իսրայէլի միջեւ: Արդարեւ, Իսրայէլի վարչապետ
Պենիամին Նեթանիահու Օպամայի ներկայութեան հեռաձայնային հաղորդակցութեամբ ներում հայցեց
Թուրքիոյ վարչապետ Էրտողանէն` «Մաւի Մարմարա» նաւու դէպքին գծով խոստանալով նիւթական
հատուցում կատարել նշեալ դէպքին ընթացքին սպաննուած ինը թուրքերուն համար: Ըստ դէտերու,
Իսրայէլի այս «ներողութեան» փոխարէն, Միացեալ Նահանգներ լրիւ զօրակցութիւն ցուցաբերած
են անոր` շրջանին մէջ ազատօրէն գործելու իր բոլոր շարժումներուն մէջ, յատկապէս Սուրիոյ
տագնապին գծով: Իսկ իսրայէլացի ընդդիմադիր ղեկավար Աւիկտոր Լիպըրման խոր ընդվզում
արտայայտեց Թուրքիա – Իսրայէլ այս «հաշտութեան» քայլին գծով` բուռն կերպով քննադատելով
Նեթանիահուի «ներողութիւն»-ը Թուրքիայէն: